ފަލަސްތީނުގެ ރެފިއުޖީންނަށް އދ. އިން ހަމަޖައްސައިދީފައިވާ އިމާރާތަކަށް އިއްޔެ އިޒްރޭލުން ހަމަލާ ދިނުމުން އާންމުން ރައްކާތެރިކަން ހޯދަން މަސައްކަތްކުރަނީ: މިފަދަ ހަމަލާތަކާ ދެކޮޅު ހެދުމުގެ ގޮތުން ހަމާސްއިން ވަނީ ސުލްހައިގެ ވާހަކަތަކުން ވަކިވާން ނިންމާފައި. -- ފޮޓޯ: އޭއެފްޕީ
15 ޖުލައި 2024 - 05:50
1 comments
އިޒްރޭލުން ހަމާސްގެ އިސް ދެ ކޮމާންޑަރަކަށް އަމާޒުކޮށް ހަމަލާދީ އެތައް ބަޔަކު ޝަހީދުކޮށްލުމުން، ސުލްހައިގެ ވާހަކަތަކުން ހަމާސް ވަކިވާން ނިންމައިފި އެވެ.
އިޒްރޭލުން ހަމާސްގެ އަސްކަރީ ލީޑަރު މުހައްމަދު އައް ޟައިފް އާއި ކޮމާންޑަރެއް ކަމަށްވާ ރަފާ ސަލާމާ އަށް ހަމަލާ ދިނީ އިޒްރޭލުން ރައްކާތެރި ސަރަހައްދުގެ ގޮތުގައި ކަނޑައަޅާފައިވާ ސަރަހައްދަކުންނެވެ. އެ ހަމަލާގައި 92 މީހަކު ޝަހީދުވެފައި ވާއިރު އިޒްރޭލުން ބުނެފައިވަނީ އެ ހަމަލާގައި ސަލާމާ އަވަހާރަވި ކަމަށެވެ.
އިޒްރޭލުން ބުނަނީ މި ދެ ބޭފުޅުންނަކީ އިޒްރޭލަށް އޮކްޓޫބަރު 7 ގައި ހަމާސް އިން ދިން ހަމަލާގެ މޭސްތިރިންގެ ތެރޭގައި ހިމެނޭ ބައެއް ކަމަށެވެ.
ހަމާސްގެ އިސް އޮފިޝަލަކު އޭއެފްޕީއަށް ވިދާޅުވީ މީގެ ނުވަ މަސް ކުރިން ފެށިގެން އިޒްރޭލުން ދެމުން ގެންދާ ހަމަލާތަކާއި ހަމާސްގެ ރައްދު ހަމަލާތައް ހުއްޓުމަކަށް ގެނެސް އިޒްރޭލުގެ ރަހީނުން މިނިވަންކުރުމާ ބެހޭ ގޮތުން ކުރަމުން އަންނަ މަޝްވަރާތަކުން ވަކިވާން ހަމާސް އިން މިހާރު ނިންމާފައިވާ ކަމަށެވެ. މިގޮތަށް ނިންމުމުގެ އެއް ސަބަބަކީ އިޒްރޭލުން އަދިވެސް ގަތުލްއާންމުތައް ހިންގަމުން ދިއުން ކަމަށް އޮފިޝަލް ވިދާޅުވި އެވެ.
ޣައްޒާގައި ހުންނަ ހެލްތު މިނިސްޓްރީން ބުނި ގޮތުގައި އިޒްރޭލުން ދިން ހަމަލާގައި 92 މީހަކު ޝަހީދުވެފައި ވާއިރު 300 މީހަކު ޒަހަމްވެފައިވެ އެވެ.
ގަތަރުގައި އުޅުއްވާ، ހަމާސްގެ ސިޔާސީ ގޮފީގެ ވެރިޔާ އިސްމާއިލް ހަނިއްޔާ ވަނީ ހަމަލާތައް ހުއްޓާލުމާ ގުޅޭ މަޝްވަރާގައި އިޒްރޭލުގެ ސީރިއަސްކަމެއް ނެތުމާއި މަޝްވަރާތައް ލަސްކޮށް އަދި ހުރަސްތައް ކުރިމަތިކުރާތީ އާއި ހަތިޔާރެއް ނެތް އާންމުންނާ ދެކޮޅަށް ހަމަލާދީ ގަތުލްއާންމުތައް ހިންގާތީ މަޝްވަރާތަކުން ވަކިވާން ނިންމިކަން މެދުވެރިންގެ ދައުރު އަދާކުރާ ގައުމުތަކަށް ދަންނަވާފައި ކަމަށް ހަމާސްގެ އޮފިޝަލް ވިދާޅުވި އެވެ.
އެކަމަކު މި ކަންކަން އިޒްރޭލުން ރަނގަޅުކޮށްފި ނަމަ އަލުން މަޝްވަރާތައް ފަށަން ހަމާސް ތައްޔާރަށް އޮންނާނެ ކަމަށް ވެސް ވަނީ ބުނެފަ އެވެ.
އިޒްރޭލަށް ހަމާސްއިން ހަމަލާދީ ހާހަކަށްވުރެ ގިނަ މީހުން މަރާލައި 250 އަށް ވުރެ ގިނަ މީހުން ރަހީނުކުރުމާ އެކު އިޒްރޭލުން ދޭން ފެށި ހަމަލާތަކުގައި ފަލަސްތީނުން މިހާތަނަށް 38،000 އަށް ވުރެ ގިނަ މީހުން ވަނީ ޝަހީދުވެފަ އެވެ. ހަމަލާ ދެނީ ހަމާސް ނައްތާލަން ކަމަށް ބުންޏަސް ގެއްލުންވަމުންދަނީ އާންމުންނަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މާހިރު
15 July 2024
ހަޤީޤަތުގައި އިސްރާއީލަކީ ބައިނަލް އަޤުވާމީ އެއްވެސް ޤާނޫނަކަށް ތަބާވުމެއްނެތި، ގަދަބާރުން ފަލަސްތީނަށާއި ފަލަސްޓޠީނުގެ ރައްޔިތުންނަށް ހިތުހުރި ގޮތެއް ހަދަމުންދާ ބައެކެވެ. އެފަދަ ބަޔަކާއެކު މަޝްވަރާކޮށްގެން ކުރާނެ ފައިދާއެއް ނޯންނާނެއެވެ. ހަމައެކަނި އޮތްގޮތަކީ މުސްލިމުން އެއްބައިވެ ޔަހޫދީން ބަލިކުރުމެވެ.