ހަތަރު ދަރިންގެ މަރާ އެކު ދެން ދިން އަނިޔާ މާ ބޮޑު

އެއީ ގުރައިދޫ މަރުކަޒުގައި އަންހެނުން ތިބޭ ވޯޑެވެ. ގެއެއް ގޮތަށް ހުރި އެތަނުގެ ފެންޑާ އަށް ވަންއިރު، ޖޯލިފައްޗާއި ގޮނޑިތަކުގައި އިށީނދެލައިގެން އެކި އުމުރުގެ އަންހެނުން ތިއްބެވެ؛ ހާއްސަ އެހީ އަށް ބޭނުންވާ މީހުންނާއި ނަފުސާނީ ބައްޔަށް ފަރުވާކޮށް ރަނގަޅުވެފައިވާ މީހުންނާއި އަޅާލާނެ މީހަކު ނެތިގެން އެތަނުގައި ގޮތްހުސްވެފައި ތިބި، ދައްތައިންނާއި މައިންނާއި އަދި މާމަމެންނެވެ.

އެތަނަށް ވަނުމާ އެކު އެ އެންމެންގެ ކަޅި ހުއްޓުނީ އަހަރެމެންނަށެވެ. އާންމުކޮށް ނުފެންނަ ބަޔަކު އެތަނުން ފެނުމުން އެ މީހުން ހައިރާންވި އެވެ.

އަހަރެމެން މިއީ ކޮން ބައެއްތޯ ބަލަން ޝައުގުވެރިވެފައި ތިބިކަން އެނގުނީ އެތަނުން މީހަކު "އަހަރެން ބަލާ އައީތަ؟" އޭ ބުނާ އަޑު އިވުމުންނެވެ. އެ ނޫން އެއްވެސް މީހަކު ވާހަކަނުދައްކާ، ހަމަ ތިބީ ބަލަހައްޓައިގެންނެވެ. އެ އެންމެންގެ މޫނުމަތިން ވެސް ފެނުނީ މަޑުމޮޅިކަމާއި ހިތާމަ އެވެ. ހިނިތުންވުމެއް ނެތެވެ. އެކަމަކު، ފުރޮޅުލީ ގޮނޑިއެއްގައި އިން އަންހެނަކު އިނީ އަހަރެމެން ފެނުމުން ވަރަށް ހެވިފަ އެވެ. އަހަރެމެންނާ ވަރަށް ވާހަކަދައްކާ ހިތުން އޭނާ އިންހެން ހީވެގެން ގޮސް ސަލާންގޮވީމެވެ.

ސަލާން ބަލައިގެންފައި، "ކޮއްކޯ އަވަހަށް އާދޭ އިށީންނަން"އޭ ބުނެ، އޭނާ ކައިރީގައި ހުރި ގޮނޑިއެއްގައި ބައިންދައި، ވާހަކަ ފެށި އެވެ.

އަހަރެމެން އެތަނަށް ދިޔައީ "ކޮންވަޑާމަކުތޯ" އޭނާ އެއްސެވެ. ދިޔައީ އެ މަރުކަޒުގައި ތިބި މީހުންގެ ހާލު ބަލައިލަންށޭ ބުނުމުން ހާދަހާ ރަނގަޅު ކުއްޖެކޭ ބުންޏެވެ. އޭނާގެ އެއްބަނޑު މީހުންނަށް ވެސް ތިވަރެއް ނުވިޔޭ ބުންޏެވެ. އެހެން ބުނުމާ އެކު އޭނާގެ މޫނުމަތީގެ ކުލަ ބަދަލުވެ، މާޔޫސްކަން ފެންނަން ފެށި އެވެ. އެ ހިނިތުންވުމުގެ ފަހަތުގައި އޮތީ ހިތްދަތި ވާހަކަތަކެއް ކަން އެ ހިސާބުން ޔަގީންވި އެވެ.

އެ މަރުކަޒުން ހިތާމަވެރި ވާހަކައެއް ނޫނީ އިވިދާނެ ކަމަށް އަހަރެމެން އުއްމީދު ކުރީ ވެސް ކީއްވެ ހެއްޔެވެ؟

ދިރިއުޅުން ބަދަލުކޮށްލީ ހަކުރު ބަލި!

އޭނާގެ އަސްލު ނަން ހާމަނުކޮށް، މި ލިޔުމުގައި ބޭނުންކުރަނީ އާމިނަތު އަލީ އެވެ. މިހާރު އުމުރުން 49 އަހަރުގެ އާމިނަތަށް ހަތަރު ކުދިން ލިބުނެވެ. އެކަމަކު ވަރަށް ޅައުމުރުގައި އެ ހުރިހާ ކުދިން ވެސް މަރުވި ކަމަށް އޭނާ ބުންޏެވެ. ކުދިން މަރުވުމުން، ފިރިމިހާ ވެސް ވަރިކޮށްފައި ދިޔައީ އެވެ.

ކުދިންގެ ވާހަކަދައްކަން ފެށުމާ އެކު އޭނާ އަށް ރޮވުނެވެ. ދުނިޔޭގައި ކުއްޖަކު ނެތް އިރު، އޭނާ ބަލިވި ދުވަހު އާއިލާގެ އެކަކު ވެސް އަޅާނުލި ކަމަށް ބުންޏެވެ. ކުދިން މަރުވީ ކިހިނެއްތޯ އަހަން އުޅުނު ނަމަވެސް، އޭނާ ގިސްލާފައި ރޯން ފެށުމުން، ފަހުން އެ ވާހަކަ އަހަން ހަނދާނެއް ވެސް ނުވި އެވެ.

އާމިނަތު ބުނި ގޮތުގައި އޭނާގެ ކުދިން ނެތަސް، އެއްބަނޑު އެއްބަފާ ފަސް މީހުން ތިބެ އެވެ. އޭގެ ތެރެއިން، އެކަކު މަރުވެފައިވާއިރު، ދުނިޔޭގެ ގަދަވެ ސަލާމަތުން ތިބީ ހަތަރު މީހެކެވެ. އޭނާ ދެން ކިޔައިދިނީ އެމީހުން އޭނާއާ މެދު ކަންތައްކުރި އިހާނެތި ގޮތުގެ ވާހަކަތަކެވެ.

އެ މަރުކަޒަށް އާމިނަތު ގެންދިޔައީ ހަކުރު ބަލީގައި ހާލު ބޮޑުވެ، ހިނގާ ނޫޅެވި، ގޮނޑީގައި އިންނަން ޖެހުމުން އާއިލާ އަށް އޭނާ ބެލެން ނެތް ކަމަށް ބުނެ އެވެ. އާމިނަތު ބުނީ އާއިލާއިން އޭނާ އެ މަރުކަޒާ ހަވާލުކުރީ ތިން މަސް ފަހުން ބަލާ އަންނާނެ ކަމަށް ބުނެފަ އެވެ. އެކަމަކު، އޭގެ ފަހުން މިހާރު ފަސް އަހަރު ވެއްޖެ އެވެ. އެއިން މީހެއްގެ ހިލަމެއް، ޚަބަރެއް ދަބަރެއް ވެސް ނެތެވެ.

"ގެންދާނަމޭ ކިޔައިފައި ދިޔަ މީހުން، ވާހަކަ ވެސް ނުދައްކާ،" ތުރުތުރުލާ އަޑަކުން އާމިނަތު ކިޔައިދިނެވެ.

"މަގޭ އެއްބަނޑު، މަގޭ އައިލާ މީހުން މި ކިޔަނީ. އެވެރިން ހަމަ އަަޅާނުލާއި ފޮނުވައިލީ. ދެން އެވެރިން ފޮނުވާލި ގޮތަށް މި އިންނަނީ. ކޮންމެވެސް ގޮތަކަށް އުޅެން ޖެހޭނެތާ."

އެތަނުގައި އިންނައިރު ލައްކަ އެއްޗެހި ހިތަށް އަރާ ކަމަށާއި، އޭނާގެ އެއްބަނޑު މީހުން އޭނާއާ މެދު ކަންތައް ކުރި ހިތްދަތި ގޮތް ދުވަހަކު ވެސް ހަނދާނުން ފިލައިގެން ނުދާނެ ކަމަށް ބުންޏެވެ. އެމީހުންނަށް ދުވަހަކު ވެސް މާފު ނުކުރާނެ ކަމަށް ބުންޏެވެ.

އާމިނަތު ބުނީ އާއިލާގެ މީހުންނަށް ވުރެ މަރުކަޒުގައި ތިބޭ މުވައްޒަފުން ވެސް އޭނާ އަށް މާ ރަނގަޅު ކަމަށެވެ. އެތަނުގައި ފަސް އަހަރުވީ އިރު ދުވަހަކު ވެސް އޭނާ ހިތުގައި ޖެހޭ ކަމެއް އެމީހުން ނުކުރާ ކަމަށެވެ.

"ބުނަން ވަރަށް ދެރަ ވަރަށް ނިކަމެތި ހާލުގައި މި އިނީ. އެހެނެއް ނޫން، ކާންދޭ، ބޯންދޭ، ފެންވަރުވައިދީ، ފުނާ އަޅުވާއި ފުއްޖަހާއި ދޭ. މި ވެރިން [މަރުކަޒުގެ މުވައްޒަފުން] ރަނގަޅުކަމުން މި އުޅެވެނީ،" އޭނާ ބުންޏެވެ.

"މަގޭ އެއްބަނޑު މީހުން މަ އަތުގައި ހުރިއްޔާ ހުރި ރަނަކާއި ތަނޑިއަކާއި، ފައިގައި ހުރިއްޔާ ހުރި ރަނަކަށް ދަންދެން، އަތުގައި ހުރި އަނގޮޓިއަކަށް ދަންދެން އަތުލައިފައި މަރުކަޒަށް ފޮނުވާލީ."

"ހަމަ ހުރިހާ އެއްޗެއް ވެސް ފޮރުވާފައި ރައްކާކޮށްފައި ބެހެއްޓީ އަދި އަދަދަށް ވެސް. ކާކުގެ ކަރުގައި އަޅުވަން؟ މަ ނެތް ދުނިޔެއެއްގައި ކާކުގެ ކަރުގައި އަޅުވަން؟"

ޒުވާން އުމުރުގައި ފިސާރި އަންހެނެއް

އާމިނަތު ބުނީ އޭނާ އަކީ ޒުވާން އުމުރުގައި ވަރަށް ފިސާރި އަންހެނެއް ކަމަށެވެ. ގޭތެރޭ މަސައްކަތުން ފެށިގެން ކުޅިވަރާއި އެހެން ކަންކަމުގައި ވެސް އޭނާ ނުކުރާ އެއްވެސް ކަމެއް ނުހުންނާނެ ކަމަށެވެ. މީހަކަށް ބަރޯސާނުވެ ދިރިއުޅުނީ އަމިއްލަ އަށް މަސައްކަތްކޮށްގެން ލިބުނު ފައިސާއިންނެވެ. އެކަމަކު އެ ހުރިހާ ކަމަކުން އޭނާ ބާކީވެ، ދިރިއުޅުން ބަނަވީ ހަކުރު ބަލީގަ އެވެ.

"ހާދަހާ މަސައްކަތެއް ކުރި އަންހެން ކުއްޖެކޭ މަ މީ. މިއަދު މިތަނަށް ލައިފައި އިނީމަ މިތާ މީހުން ވިދާޅުވާ ގޮތަށް މި އުޅެނީ،" އޭނާ ބުންޏެވެ.

ކުދިން މަރުވި ފަހުން އެހެން މީހަކާ ރައްޓެހިވެ، ދެވަނަ ކައިވެންޏެއް ވެސް ކުރަން އޭނާ އުޅުނެވެ. އެކަމަކު، އޭނާ ބަލިވުމުން އިންނަން އުޅުނު އެ މީހާ ވެސް އޭނާ ދޫކޮށްފައި ދިޔައީ އެވެ. އެ ހިސާބުން އޭނާ މުޅިން އެކަނިވެރިވީ އެވެ.

"މަށަށް ވެސް އަދި އަންނާނެ ދުވަހެއް. އެ ދުވަސް އަންނަން ދެން މީނީ ބަލަން. ދުނިޔޭގައި ހުރިއްޔާ ކޮންމެސް ދުވަހަކު އެމީހުން އަދި އަންނާނެ މަ ފަހަތުން،" އޭނާ ބުންޏެވެ.

އާމިނަތު ގޮތަށް، އެ ވޯޑުން އަހަރެމެންނާ ދިމާވި އެންމެން ވެސް ކިޔައިދިނީ ހަމަ އެ ކަހަލަ ހިތްދަތި ވާހަކަތަކެކެވެ؛ އެއްބަނޑު މީހުން ނުވަތަ ދަރިން އަޅާނުލާ ދޫކޮށްލީ އެވެ. އޭގެ ތެރޭގައި ބަލި މީހުންނާއި ގަދަވެ ސަލާމަތުން ތިބި މީހުން ވެސް އެބަ ތިއްބެވެ. އަމިއްލަ ދިރިއުޅުން މާ ބިޒީވުމުން، އެމީހުން ބަލަން ނޫޅެވޭނެޔޭ ބުނެ، އެތަނަށް ގެންދަނީ އެވެ. އަދި އެތަނަށް ލާ ފަހުން، ޚަބަރު ވަނީ މަދު މީހެއްގެ އާއިލާއަކުންނެވެ.

އާއިލާ ނުވަތަ ދަރިން ކިތައްމެ ގޯސްކޮށް ކަންތައް ކޮށްފައި ހުއްޓަސް، އެމީހުން ކުށްވެރިކޮށް އެ ވާހަކަތައް ކިޔައިދޭން ވެސް ބައެއް މީހުން ބޭނުމެއް ނުވި އެވެ. އާއިލާ ގޯސްކޮށްފައި ވާހަކަދައްކަން އާމިނަތު ވެސް ފުރަތަމަ ބޭނުމެއް ނުވި އެވެ. އެކަމަކު، އޭނާ އަހަރެމެން ގާތު އެހީ، އެ ވަރުގެ ބޮޑު އަނިޔާއެއް ދިނުމުން އެ ވާހަކަ ނުދައްކާ އިންސާނެއް ހިތަށް ކެތްވާނެ ހެއްޔޭ އެވެ. އެ ވާހަކަ ނުދައްކާ ކިތައް ދުވަހު ހުރެވިދާނެ ހެއްޔޭ އެވެ. އޭނާގެ ހަތަރު ދަރިން މަރުވުމަށް ފަހު، އާއިލާއިން ދިން އަނިޔާ މާ ބޮޑެވެ.