ފައިސާ ހުރީ ސެޕްޓެމްބަރު މަހުގެ ނިޔަލަށް ފަލަސްތީނަށް އެހީ ދެވޭ ވަރަށް: އދ

ފައިސާ ހުރީ ސެޕްޓެމްބަރު މަހުގެ ނިޔަލަށް ފަލަސްތީނަށް އެހީވެވޭ މިންވަރަށް ކަމަށާއި އެހެންވެ މި ވަގުތު އެހީތެރިކަން ވަރަށް ބޮޑަށް ބޭނުންވެފައިވާ ކަމަށް އދ.ގެ ސެކްރެޓަރީ ޖެނެރަލް އެންޓޯނިއާ ގުޓަރެސް ވިދާޅުވެއްޖެ އެވެ.

ފަލަސްތީނުގެ ރެފިއުޖީނަށް ހާއްސަކޮށް އުފައްދާފައިވާ "އުންރުވާ" އަށް ބޭނުންވާ ފައިސާ ހޯދުމަށް ބާއްވާ ކޮންފަރެންސްގައި ގައުމުތަކާއި ޖަމިއްޔާތަކުން ދޭނެ ކަމަށް ވައުދުވި އެހީއާ ބެހޭ ގޮތުން ވާހަކަ ދައްކަވަމުން އެ ޖަމިއްޔާގެ ވެރިޔާ ފިލިޕް ލަޒާރީނީ ވިދާޅުވީ މި ފައިސާއިން ސެޕްޓެމްބަރު މަހުގެ ނިޔަލަށް ކުރެވޭނީ އިމަޖެންސީ ހާލަތުގައި މި ވަގުތު ކޮންމެހެން ކުރަންޖެހޭ ކަންތައްތައް ކަމަށެވެ.

އޭނާ ވިދާޅުވީ އިޒްރޭލަށް އޮކްޓޫބަރު 7 ގައި ހަމާސް އިން ދިން ހަމަލާތަކުގައި އުންރުވާގެ ބައެއް މުވައްޒަފުން ބައިވެރިވި ކަމަށް އިޒްރޭލުން ކުރި ތުހުމަތާ އެކު އެތައް ގައުމަކާއި ޖަމިއްޔާއަކުން އެހީތައް މެދުކަނޑާލާފައިވާ ކަމަށެވެ.

ގުޓަރެސް ވިދާޅުވި ގޮތުގައި އުންރުވާއަށް މި ވަގުތު ބޮޑު އެހީތެރިކަމެއް ބޭނުންވަނީ އެ ޖަމިއްޔާގެ މަސައްކަތާ ނުލައި ފަލަސްތީނުގެ އެތައް ރައްޔިތުންނަކަށް އިންތިހާ ދަރަޖައިގެ ދަތިކަން ކުރިމަތިވާނެތީ އެވެ.

"ވަރަށް ސާފުކޮށް ބުނާ ނަމަ، އުންރުވާ ނޫން އެހެން ބަޔަކަށް މިކަމެއް ނުވާނެ،" އެހީގެ މަސައްކަތް އުންރުވާ ނޫން ބަޔަކު ލައްވާ ކުރުވަން އިޒްރޭލުން ދޭ އިންޒާރާ ގުޅުވައި ގުޓަރެސް ވިދާޅުވި އެވެ.

"ޣައްޒާގައި ވަކި މިއަށްވުރެ ބޮޑަށް ހާލަތު ގޯހެއް ނުވޭ -- ކޮންމެވެސް ގޮތަކުން، ބިރުވެރި ގޮތަކަށް، އާންމުން އެ ދަނީ ބިރުވެރިކަމުގެ ތެރެއަށް އިތުރަށް ވެއްޓެމުން،" ގުޓަރެސް ވިދާޅުވި އެވެ.

އޭނާ ވިދާޅުވީ ދެމުން ގެންދާ ހަމަލާތަކުގައި މިހާތަނަށް އުންރުވާގެ 195 މުވައްޒަފަކު ވަނީ މަރުވެފަ އެވެ. މިއީ އދ.ގެ ތާރީހުގައި ވެސް އެ ޖަމިއްޔާގެ މުވައްޒަފުން މިހާ ގިނަ އަދަދަކަށް މަރުވި ފަހަރެވެ.

އެމެރިކާގެ ކޮންގްރެސްއިން ވަނީ އުންރުވާ އަށް އިތުރު ފައިސާ ދިނުން މަނާކޮށްފަ އެވެ. ރައީސް ޖޯ ބައިޑަންގެ ސަރުކާރުން ވަނީ އޭގެ ބަދަލުގައި ފަލަސްތީނުގެ އާންމުންނަށް އެހެން ޖަމާއަތްތައް މެދުވެރިކޮށް އެހީވުމަށް ނިންމައިފަ އެވެ. -- އޭއެފްޕީ